Nubia brendi “gamer” auditoriyasına yönəlmiş “Nubia Neo 5 GT” smartfonunun yaxın zamanda təqdim olunacağını elan edib. İstehsalçı yeni modelin texniki xüsusiyyətləri barədə ətraflı məlumat verməsə də, bunu insayderlərdən biri edərək cihazın render görüntülərini də internetdə paylaşıb.
Nubia Neo 5 GT-nin tizerində ventilyator təsvir olunub ki, bu da aktiv soyutma sisteminin istifadə ediləcəyinə işarə edir. Buraxılış tarixi isə dəqiq gün göstərilmədən MWC 2026 sərgisi dövrünə (2–5 mart) planlaşdırılıb.
Smartfonun xüsusiyyətləri və renderləri raihanhann129 ləqəbli insayder tərəfindən dərc olunub. Mənbəyə görə, cihaz korpusun yan hissəsində oyun üçün trigger düymələri, nazik çərçivəli ekran və 50 MP əsas sensorlu ikili arxa kamera ilə təchiz ediləcək.
Məlumata əsasən, smartfonun performansına Unisoc T9100 prosessoru cavabdeh olacaq. O, LPDDR4X operativ yaddaş və UFS 3.1 yaddaş qurğusu ilə birlikdə çalışacaq. Gözlənilən AMOLED ekran xüsusiyyətləri belədir: 6,77 düym diaqonal, Full HD+ təsvir ölçüsü, 120 Hz yenilənmə tezliyi və 1200 nit pik parlaqlıq.
Digər gözlənilən xüsusiyyətlərə 80 vatt sürətli enerji yığmanı dəstəkləyən 6000 mAh tutumlu batareya, DTS:X Ultra dəstəyi olan stereo dinamiklər və xətti vibrasiya mühərriki daxildir. Smartfonun ağ, qara və sarı rəng seçimləri ilə satışa çıxarılacağı bildirilir. Yeni modelin qiyməti isə hələ açıqlanmayıb.
Fikirləriniz ?
