Apple rəsmi olaraq iPhone 17 seriyasının ən əlçatan modeli olan “iPhone 17e” modelini təqdim edib. Yeni smartfon yenilənmiş platforma, daha möhkəm korpus qorunması və artırılmış başlanğıc yaddaş ilə gəlir. Digər xüsusiyyətlər isə əvvəlki modelə çox bənzəyir.
Smartfon 6.1 düymlük OLED Super Retina XDR ekranla təchiz olunub. HDR rejimində maksimal parlaqlıq 1200 nit təşkil edir. Ön panel yeni Ceramic Shield 2 şüşəsi ilə qorunur və bu şüşə cızıqlara qarşı daha davamlıdır, eyni zamanda işıq əks olunmasını azaldır. Korpus alüminiumdan hazırlanıb və IP68 standartına uyğun olaraq suya və toza qarşı qorunur. Kilidin açılması Face ID vasitəsilə həyata keçirilir, yan hissədə isə fərdiləşdirilə bilən Action Button yerləşir.
Cihazın əsasını yeni Apple A19 prosessoru təşkil edir və o 3 nm texnoloji proseslə hazırlanıb. Çip 6 nüvəli CPU, ray tracing dəstəyi olan 4 nüvəli GPU və süni intellekt tapşırıqları üçün 16 nüvəli Neural Engine ilə təchiz olunub. Bundan əlavə, smartfonda daha sürətli və enerji baxımından daha səmərəli olan Apple C1X modemi istifadə edilib. Apple bildirir ki, bir enerji yığımı iPhone 17e üçün tam bir gün istifadə imkanı verir.
Smartfon USB-C vasitəsilə sürətli enerji yığımını dəstəkləyir və təxminən 30 dəqiqəyə 50% enerji toplaya bilir. Bundan əlavə MagSafe və Qi2 simsiz enerji yığımı (15W-a qədər) də mövcuddur. Maqnit sistemi müxtəlif aksesuarlarla — enerji yığma qurğuları, qoruyucu örtüklər və digər əlavələrlə uyğun işləyir.
Yeni iPhone 17e qara, ağ və açıq çəhrayı rənglərdə təqdim olunacaq və 256 GB və 512 GB yaddaş variantları ilə satışa çıxacaq.
Qiymətlər:
256 GB — 599 dollar
512 GB — 799 dollar
Öncədən sifarişlər 4 mart, satışlar isə 11 mart tarixində başlayacaq.
Fikirləriniz ?
