NVIDIA gözlənilmədən Intel-in səhmlərinə 5 milyard dollar sərmayə yatırdığını və fərdi kompüterlər (PC) ilə data mərkəzləri üçün ortaq prosessorların hazırlanması planlarını açıqladı. Tərəfdaşlıq çərçivəsində Intel yeni PC çiplərində NVIDIA-nın qrafik texnologiyalarından istifadə edəcək, həmçinin NVIDIA-nın aparat platformaları əsasında qurulan server həlləri üçün öz prosessorlarını təchiz edəcək.
Bu razılaşma son illərdə bazar payını itirən və aktiv şəkildə investisiya axtaran Intel-i dəstəkləmək üçün atılan ən iri addımlardan biri oldu. Bundan əvvəl şirkətə ABŞ hökuməti və Yaponiyanın SoftBank holdinqi sərmayə qoymuşdu. Əlavə olaraq, Intel aktivlərin satışı yolu ilə də maliyyə vəsaiti cəlb edir.
Xəbərin fonunda Intel-in səhmləri Nyu-York birjasında ticarətin açılışında demək olar ki, 28% bahalaşdı. İnvestorlar süni intellekt sahəsində lider mövqelərə malik NVIDIA ilə əməkdaşlığın güclənməsinə müsbət reaksiya verdilər. Öz növbəsində, həm PC, həm də videokart bazarında hər iki şirkətə rəqib olan AMD-nin səhmləri təxminən 6% ucuzlaşdı.
Tərəfdaşlıq çərçivəsində NVIDIA qrafikası ilə inteqrasiya olunmuş PC prosessorlarının yaradılması, eləcə də NVIDIA sürətləndiriciləri ilə təchiz edilmiş server klasterlərində Intel çiplərinin istifadəsi nəzərdə tutulur. İlk ortaq həllərin bazara çıxma tarixi hələ açıqlanmayıb, lakin hər iki şirkət bu əməkdaşlığın onların uzunmüddətli planlarını dəyişmədiyini vurğulayıb.
Fikirləriniz ?
