General Motors, bir dəfəlik enerji yığımı ilə səyahət məsafəsində yeni dünya rekordu müəyyən etdiyini açıqlayıb. Elektrik pikapı Chevy Silverado EV dayanmadan 1705 km qət edib. Test 7 gün davam edib və GM-in Milford sınaq poliqonuna yaxın, ümumi istifadə üçün açıq yollarda keçirilib.
Rekord 2026-cı il Silverado EV Work Truck modeli ilə qırılıb. Bu model rəsmi olaraq EPA qiymətləndirməsinə görə 793 km məsafə qət edə bilir. Avtomobil “ağıllı idarəetmə üsullarından” istifadə edib, məsələn, 32–40 km/saat sürətlə hərəkət etmək kimi. Bundan əlavə, GM mühəndisləri bir sıra fəndlər tətbiq edib və müəyyən dəyişikliklər ediblər.
Onlar ehtiyat təkəri çıxarıb, təkərlərdə təzyiqi artırıblar, təkərlərin bucaqlarını optimallaşdırıblar və aerodinamik müqaviməti azaltmaq üçün yük yerinə qapaq əlavə ediblər. Həmçinin, kondisioner sistemi söndürülüb və batareya səmərəliliyini artırmaq üçün optimal hava şəraitindən istifadə olunub.
GM, nəticəni Ginnesin Rekordlar Kitabına təqdim etməyi planlaşdırmasa da, bu göstərici artıq diqqət çəkib. Buna qədər rekord Lucid Air Grand Touring modelinə məxsus idi – o, 1205 km məsafə qət etmişdi. Ondan əvvəl isə bu titul Mercedes-Benz EQS 450+ modelinə məxsus idi – 1044 km nəticə ilə.
Fikirləriniz ?
