Çin mühəndisləri yeni maqnit yastığı üzərində hərəkət edən (maglev) qatarın prototipini təqdim ediblər. Sınaqlar zamanı qatar saatda 650 km sürətə çatıb. Bu göstərici maqnit yastığı texnologiyası ilə işləyən qatarlar arasında dünya üzrə ən yüksək sürət olub. Lakin bu, onun imkanlarının son həddi deyil.
Ənənəvi relsli nəqliyyatdan fərqli olaraq, maglev qatarlarının təkərləri olmur — onlar maqnit sahəsinin təsiri ilə relslərin üzərində havada hərəkət edirlər. Yeni Çin modeli hərəkətə rezin təkərlərlə başlayır, lakin sürət 100–200 km/saat-a çatdıqda təkərlər yığılır və qatar levitasiya rejiminə keçir. Sınaq laboratoriyasının rəhbəri Li Veyçao bildirib ki, qatar cəmi bir kilometr məsafədə 650 km/saat sürətə çata bilir və layihə üzrə nəzərdə tutulmuş maksimal işçi sürət 800 km/saat olacaq.
Təəccüblü nəticələrə baxmayaraq, bu cür texnologiyalar hələ də ciddi çətinliklərlə üzləşir. İnfrastrukturun yüksək dəyəri, texniki mürəkkəblik və digər amillər maglev texnologiyasının dünyada geniş tətbiqini əngəlləyir. Hətta bu sahədə lider olan Yaponiyada belə, yeni maqnit yastığı xəttinin istifadəyə verilməsi təxminən on il gecikdirilib. Digər ölkələrdə də layihələr ekoloji və hüquqi maneələrlə qarşılaşır.
Bu arada Çin artıq Şanxay ilə hava limanını birləşdirən fəaliyyət göstərən maglev xəttinə malikdir. Bu qatar 431 km/saat sürətlə hərəkət edir və dünyanın ən sürətli kommersiya qatarı olaraq qalır. Testlərdə 650 km/saat sürətə çatan yeni maglev layihəsi isə Çini yerüstü nəqliyyat sahəsində dünya liderinə çevirə bilər. Sınaq platformasının tikintisinin ilin sonuna qədər tamamlanması planlaşdırılır.
Fikirləriniz ?
