The Verge nəşrinin məlumatına görə, OpenAI-nin növbəti layihəsi İlon Maska məxsus olan X platformasına bənzər sosial şəbəkə olacaq. Hazırda bu layihənin prototipi ilkin inkişaf mərhələsindədir və şirkət daxilində test olunur. Prototip əsasən şəkil generasiyasına fokuslanıb.
Mənbənin iddiasına görə, OpenAI-nin baş direktoru Sem Altman layihə barədə rəy almaq üçün şəxsi ekspertlərə şəxsən müraciət edib. Yeni sosial şəbəkənin ayrıca tətbiq kimi istifadəyə verilib-verilməyəcəyi, yoxsa ChatGPT-yə inteqrasiya olunacağı hələlik məlum deyil. Şirkət rəsmi açıqlama vermir.
Xatırladaq ki, hələ fevral ayında İlon Mask OpenAI-nin 97,4 milyard dollara satın alınmasını təklif etmişdi. Altman isə buna zarafatla cavab vermişdi: “Təşəkkürlər, amma biz Twitter-i 9,74 milyarda almağa hazırıq, əgər istəsəniz.” Sənaye ekspertləri hesab edirlər ki, bu sosial şəbəkənin istifadəyə verilməsi Altman və Mask arasında rəqabəti daha da artıracaq, həmçinin bazardakı digər nəhəng oyunçularla mübarizəyə səbəb olacaq.
Yeni layihə OpenAI-yə real vaxtda yenilənən unikal məlumat bazası təqdim edə bilər ki, bu da İA modellərinin təkmilləşdirilməsi üçün çox əhəmiyyətlidir. The Verge jurnalistlərinin sözlərinə görə, layihənin əsas ideyalarından biri odur ki, süni intellekt insanlara daha maraqlı məzmun yaratmaqda və paylaşmaqda köməklik etsin. Layihənin adı və istifadəyə verilmə tarixi ilə bağlı hələ rəsmi məlumat yoxdur.
Fikirləriniz ?
