OpenAI yeni GPT dil modelinin versiyasını artıq avqustun əvvəlində təqdim edə bilər. The Verge və Axios-un məlumatına görə, şirkət təqdimata hazırlığı yekunlaşdırmaq üzrədir. Bu məlumatı daha əvvəl OpenAI-nin rəhbəri Sem Altman da təsdiqləmiş və GPT-5-in “tezliklə çıxacağını” bildirmişdi.
Gözlənilir ki, GPT-5 əvvəlki modellərin imkanlarını birləşdirəcək və hal-hazırda ayrıca məhsul kimi fəaliyyət göstərən o3 adlı məntiqi düşünmə sistemini daxil edəcək. Əsas versiya ilə yanaşı, OpenAI GPT-5-in sadələşdirilmiş versiyalarını da təqdim etməyi planlaşdırır: mini və nano. Mini versiya ChatGPT və API üzərindən əlçatan olacaq, nano isə yalnız API vasitəsilə istifadə edilə biləcək.
GPT-5 ilə yanaşı, şirkət yeni nəsil ilk açıq modelini də təqdim etməyə hazırlaşır. Bu model o3 mini ilə müqayisə edilə biləcək imkanlara sahib olacaq və iyulun sonuna kimi Hugging Face və Azure kimi platformalarda istifadəyə veriləcək – əsas versiyadan daha tez.
Altmanın sözlərinə görə, gələcəkdə OpenAI daha geniş imkanlara malik universal süni intellekt modeli yaratmağa çalışır. Lakin o da etiraf edib ki, GPT-5 dərhal “qızıl standart” olmayacaq və təqdimatdan sonra tədricən inkişaf etdiriləcək.
Fikirləriniz ?
