ABŞ-ın Los-Gatos şəhərində qeyri-adi bir restoran – BurgerBots açılıb. Onun əsas xüsusiyyəti tam avtomatlaşdırılmış olmasıdır: kotletlərin qızardılmasından tutmuş burgerlərin yığılmasına qədər bütün prosesləri IRB 360 FlexPicker və YuMi adlı robotlar həyata keçirir. Hazır yeməyin verilməsi isə cəmi yarım dəqiqə vaxt alır.
IRB 360 FlexPicker və YuMi robotları konveyerlə birlikdə işləyir və sensorlar real vaxtda inqrediyentlərin sərfiyyatını izləyir. Nəticədə bütün burgerlər eyni formada hazırlanır. Hər sifariş menyu seçilərkən müştəriyə təqdim olunan QR-kodla işarələnir.
Hazırlanma prosesi tam avtomatlaşdırılmış olsa da, restoranın tam heyəti fəaliyyət göstərir. Robotlar sadəcə əti üyüdür, kotletləri qızardır, burgerləri konveyerdə yığır və onları ofisiantlara ötürür.
Dünya İqtisadi Forumunun proqnozuna görə, 2030-cu ilə qədər robotlar və süni intellektə əsaslanan sistemlər 92 milyon iş yerini əvəz edə bilər, xüsusilə kassir və fast food aşpazlarını. Lakin BurgerBots öz modelini “sistemin təkmilləşdirilməsi” kimi təqdim edir. Robotlar təkrarlanan tapşırıqları yerinə yetirir, insanlar isə xidmət və müştərilərlə ünsiyyətə fokuslanır.
Fikirləriniz ?
