Grand Theft Auto seriyası satirası, atışmaları, polis təqibləri və avtomobil oğurluqları ilə tanınır. Lakin bir geymer oyunun əsas mexanikalarından birini tamamilə kənara qoyaraq fərqli bir sınağa girişib.
Reddit-də daxtonanderson ləqəbi ilə tanınan istifadəçi GTA IV oyununu avtomobil oğurluğu etmədən 100% tamamladığını bildirib. Bunun üçün o, bir çox tapşırığı qeyri-adi üsullarla yerinə yetirib. Məsələn, Stivinin 30 maşınlıq missiyasında nəqliyyat vasitələrini oğurlamaq əvəzinə, tapşırıq zamanı verilən avtomobillə onları təhvil nöqtəsinə qədər itələyib.
Ən çətin hissə motosikletlə bağlı tapşırıqlar olub. Geymer polis maşınının ön təkərlərini vuraraq motosikletləri əzmədən itələməyə nail olub. Oğurlamaq məcburiyyətində qaldığı yeganə nəqliyyat vasitələri isə avtomatik olaraq sükan arxasına keçdiyi beş qayıq və bir helikopter olub.
Onun sözlərinə görə, bu keçid oyunu adi şəhər sakini simulyatoruna çevirib: missiyalar arasında hərəkət üçün əsasən metro və taksidən istifadə edib. Bu unikal keçid ona ümumilikdə 50 saat vaxt aparıb və Reddit istifadəçiləri bu nailiyyəti yüksək qiymətləndiriblər.
Fikirləriniz ?
