Telegram-ın tərtibatçıları istifadəçi hesabları üçün yeni funksiyanı — reytinq sistemini sınaqdan keçirməyə başlayıblar. “Durov’s Code” portalının əməkdaşlarının aşkar etdiyinə görə, reytinqə dair ilk qeyd bir neçə gün əvvəl mesencerin kodunda görünüb, hazırda isə bu funksiya test serverində işə salınıb.
Hazırkı tətbiqə əsasən, hər bir istifadəçi profilində xüsusi panelə klikləməklə öz hesabının səviyyəsini görə biləcək. Dəqiq mexanizm hələ açıqlanmasa da, ehtimal olunur ki, istifadəçi “Ulduzlar” xərclədikcə və ya hədiyyə etdikcə reytinq səviyyəsi artacaq — hər min “Ulduz” üçün səviyyənin yüksəlməsi mümkündür.
Gözlənilir ki, bu reytinq sistemi gələcəkdə bəzi məhdudiyyətlərin (məsələn, hədiyyə alış sayına limitlərin) əsasını təşkil edə və istifadəçinin ödəniş qabiliyyətini göstərən indikator kimi çıxış edə bilər. Rəsmi elan hələ verilməyib.
Fikirləriniz ?
