Omdia şirkətinin məlumatına görə, qiyməti 99 dollardan aşağı olan smartfonlarda yaddaşın dəyəri cihazın ümumi istehsal xərclərinin 64%-nə, 100–400 dollar seqmentində isə 59%-nə qədərini təşkil edə bilər. 2025-ci ilin üçüncü rübündən etibarən yaddaş çiplərinin qiyməti bütün kateqoriyalar üzrə təxminən iki dəfə artıb. Nəticədə, 400 dollara qədər olan smartfonların tədarükünün illik müqayisədə 22%-dən çox azalacağı proqnozlaşdırılır.
İstehsalçılar qiymətləri əvvəlki səviyyədə saxlaya bilmirlər. Çünki büdcə seqmentindəki alıcılar qiymət artımına daha həssas yanaşırlar və bu səbəbdən bir çox brend bu kateqoriyada fəaliyyətini azaltmağa başlayır. 400 dollardan yuxarı seqment isə hələlik daha dayanıqlı görünür — burada tədarükün 5,7% artacağı gözlənilir. Lakin yaddaşın bahalaşması bu bazara da təsirsiz ötüşməyəcək.
Analitiklərin fikrincə, Android smartfon istehsalçıları xərcləri azaltmaq üçün digər komponentlərdə qənaət etməyə məcbur qalacaqlar. Bu, daha sadə ekranlardan istifadə, kameraların sayının azaldılması, kiçik sensorların quraşdırılması və əvvəlki nəsil prosessorlara keçid kimi dəyişikliklərlə nəticələnə bilər. Bunun ilk nümunələri artıq görünür: Nothing Phone (4b) demək olar ki, daha təkmil Phone (4a) ilə eyni qiymətə satılır, yeni Motorola Moto G və Razr modelləri isə əvvəlki nəsil çiplərlə təqdim olunur.
Fikirləriniz ?
