BYD Çində gücü 3000-dən çox at gücünə çatan “Yangwang U9 Track Edition” elektrik hiperkarını buraxmağa hazırlaşır. Bu versiya adi “Yangwang U9”un bazasında hazırlanıb, lakin onun gücü iki dəfədən çox artırılıb — 960 kVt-dan 2220 kVt-a (cəmi 3019 a.g.). Hər təkər ayrıca 555 kVt gücündə mühərriklə idarə olunur, maksimal sürət isə standart olaraq 350 km/s ilə məhdudlaşdırılıb. Bu artım əsasən sürətlənməni yaxşılaşdırmaq və Xiaomi-nin idman traslarındakı nəticələrini keçmək üçün nəzərdə tutulub.
Avtomobilin çəkisini azaltmaq üçün dam və iri sabit spoyler karbon lifdən hazırlanıb, kuzov isə inkişaf etmiş aerodinamik paketlə təchiz olunub. İstəyə görə sabit spoyleri elektriklə idarə olunan kiçik variantla əvəz etmək mümkündür. Model 80 kVt·s tutumlu LFP batareyaya sahibdir, bu da CLTC standartına görə 450 km məsafə təmin edir. 500 kVt gücündə sürətli şarj stansiyaları sayəsində batareyanın 30%-dən 80%-ə qədər doldurulması cəmi 10 dəqiqə çəkir.
Sürətli traslar üçün nəzərdə tutulan “Track Edition”, hər təkərin asqısını ayrıca idarə edən qabaqcıl asqı sistemi ilə də təchiz olunub. Avtomobilin boş çəkisi 2480 kq, tam çəkisi isə 2630 kq təşkil edir. Satış tarixi və qiymət hələ açıqlanmayıb, amma Çində adi “Yangwang U9” 231 min dollara satılır. Bu isə Lotus və Rimac kimi oxşar gücə malik elektrik hiperkarlardan xeyli ucuz olduğu üçün “Track Edition”un bazarda rəqabət üstünlüyü qazana biləcəyi gözlənilir.
Fikirləriniz ?
