Çin brendi Zeekr flaqman elektrik avtomobilinin yenilənmiş versiyasını – Zeekr 001 modelini təqdim edib. Yenilənmə həm xarici görünüşə, həm də texnoloji hissəyə böyük dəyişikliklər gətirib. Bu dəfə şirkət əsas diqqəti yeni 900 voltluq arxitekturaya, rekord dərəcədə sürətli enerji yığmaya və tamamilə yenilənmiş interyerə yönəldib.
Əsas texniki dəyişiklik — avtomobilin 900 voltluq E-Powertrain platformasına keçməsidir. Bu sayədə batareyanı 10%-dən 80%-ə qədər cəmi 7 dəqiqəyə doldurmaq mümkündür.
Tam ötürücülü versiyada elektrik mühərriki 925 at gücü (680 kVt) hasil edir və 100 km/saata 2,83 saniyəyə sürətlənir. Maksimal sürət 280 km/saata çatır. Arxa ötürücülü versiyada isə CATL Qilin istehsalı olan 113 kVt·s tutumlu batareyadan istifadə olunur və bu variant CLTC dövrünə görə 810 km məsafə qət edə bilir.
Yenilənmiş interyer emosional təcrübəyə əsaslanır. Yeni Starry Sky Concert Hall mövzusu salonu ulduzlu səma animasiyası ilə bəzənmiş atmosferli bir məkana çevirir. Tavanda ulduzlar parlayır, ay hərəkət edir, vaxtaşırı meteoritlər keçir, bu isə avtomobilin içərisində unikal vizual ab-hava yaradır.
Zeekr 001 həmçinin yeni şassi, CCD Electromagnetic Damping adaptiv asqı sistemi və G-AES aktiv təhlükəsizlik texnologiyası ilə təchiz olunub. G-AES sistemi avtomobili 130 km/saata qədər sürətdə maneələrdən yayındıra bilir.
Yenilənmiş Zeekr 001 modelinin satışları Çində 11 oktyabrda başlayacaq. Şirkət qlobal satışların başlanma tarixi barədə isə hələ məlumat verməyib.
Fikirləriniz ?
