Xiaomi yenilənmiş Xiaomi SU7 Max modelini 24 saatlıq sürət və dözümlülük sınağı çərçivəsində yoxlayıb — avtomobil fasiləsiz hərəkətdə olub və mütəmadi sürətli enerji yığımı həyata keçirilib. Nəticədə Çin istehsalı elektromobil seriya modelləri arasında yeni dünya rekordu müəyyənləşdirib.
Bir sutka ərzində elektromobil ümumilikdə 4264 kilometr məsafə qət edib. Əvvəlki rekordçu Xpeng Next P7 (3961 km) bu nəticə ilə müqayisədə xeyli geri qalıb. Xiaomi SU7 Max həmçinin oxşar testlərdə 3425 km və 3717 km nəticə göstərmiş Porsche Taycan və Mercedes-Benz CLA modellərini də geridə qoyub.
Sınaq Çinin Yançen şəhərində yerləşən, uzunluğu 7,8 km olan oval trekdə keçirilib. 24 saat ərzində avtomobil 240 km/saat-a qədər sürəti qoruyub saxlayıb ki, bu da batareya və güc aqreqatı üçün ekstremal yüklənmə deməkdir. Qızmanın qarşısını SU7 Ultra modelindən götürülmüş inkişaf etmiş termonəzarət sistemi alıb. 101,7 kVt·s tutumlu batareya yalnız yüksək tempə davam gətirməyib, eyni zamanda enerjini sürətlə bərpa edib: 897 voltluq arxitektura sayəsində 15 dəqiqəyə qədər 670 km yürüş ehtiyatı yığmaq mümkündür.
Xiaomi-nin uğurunun sirri yenilənmiş texniki hissədədir. 2026-cı il versiyası dəqiqədə 22 000 dövrə çatan V6s Plus mühərrikləri ilə təchiz olunub, gücü 495 kVt, fırlanma anı isə 838 Nm təşkil edir. Maksimal sürət 265 km/saat, rəsmi yürüş ehtiyatı isə 835 km-dir.
SU7 Max modelinin rəsmi təqdimatı 2026-cı ilin aprel ayına planlaşdırılır. Çində başlanğıc qiymət 309 900 yuan təşkil edəcək ki, bu da təxminən 44 469 ABŞ dolları deməkdir.
Fikirləriniz ?
