Xbox-da aparılan restrukturizasiya çərçivəsində Aşa Şarma Minecraft layihəsini birbaşa şəxsi nəzarətinə götürdü. Bunun ardınca isə məşhur sandbox oyunu 17 ildən sonra ilk dəfə yenilənmiş sistem tələbləri əldə etdi.
Studiya bildirib ki, Minecraft: Java Edition artıq 17 ildən çoxdur mövcuddur və bu müddət ərzində oyun xeyli böyüyüb: dünyalar genişlənib, yeni funksiyalar və texniki təkmilləşdirmələr əlavə olunub. Əvvəlki sistem tələbləri isə köhnəlmiş avadanlıq və artıq aktual olmayan qrafik texnologiyalarına əsaslanırdı.
Artıq minimum sistem tələbləri 1080p təsvir ölçüsündə, 30 FPS və Fast qrafik ayarları üçün nəzərdə tutulub. Bunun üçün 64 bit əməliyyat sistemi, diskret videokart istifadə edilirsə 8 GB RAM (inteqrasiya olunmuş qrafika ilə isə 12 GB RAM), 4 nüvəli prosessor və Vulkan 1.3 dəstəyi olan, ən azı 2 GB videoyaddaşa sahib videokart tələb olunur.
Tövsiyə olunan sistem tələbləri isə 1080p təsvir ölçüsündə, 60 FPS və Fancy qrafik ayarları üçün hazırlanıb. Bu halda 16 GB RAM, daha güclü müasir prosessor və 6 GB videoyaddaşa malik videokart tövsiyə edilir.
Müasir AAA oyunlarla müqayisədə yeni sistem tələbləri yenə də kifayət qədər təvazökardır. Minecraft: Java Edition hələ də ən güclü oyun kompüteri və ya ən yeni videokart tələb etmir. Lakin tərtibatçıların sözlərinə görə, yenilənmiş spesifikasiyalar oyunun bugünkü standartlara uyğun daha stabil işləməsi üçün istifadəçilərə daha dəqiq istiqamət verəcək.
Fikirləriniz ?
