Fiziki daşıyıcılarda video oyunlar dövrü sona yaxınlaşır. Sony iyul ayında açıqlayıb ki, 2028-ci ildən etibarən yeni oyunlarını disk formatında buraxmayacaq. Son bir ay ərzində oyunçular şirkəti bu qərarı dəyişməyə çağırsa da, görünür, etirazlar nəticə verməyib.
Sony-nin maliyyə direktoru Lin Tao bildirib ki, şirkət bazarı və qərarın bütün müsbət-mənfi tərəflərini təhlil edib. Onun sözlərinə görə, bu addım hər kəsin xoşuna gəlməsə də, Sony planlarını dəyişməyəcək.
Tao əlavə edib ki, əsas səbəb məzmunun sürətlə rəqəmsal formata keçməsidir və bu proses təkcə PlayStation deyil, bütün sənayedə müşahidə olunur.
İstifadəçilər Sony-nin sosial şəbəkələrdəki tənqidlərə cavab verməməsini də sərt qarşılayıblar. Şirkət məsələni yalnız investorlarla keçirilən görüş zamanı şərh edib.
Xatırladaq ki, 23–30 avqust tarixlərində bir qrup oyunçu PlayStation-a qarşı boykot keçirməyi planlaşdırır. Onlar bu müddətdə konsollarını açmayacaq və PlayStation Network xidmətinə daxil olmayacaqlar. Bununla belə, bir çoxları aksiyanın nəticə verməyəcəyini düşünür.
Fikirləriniz ?
